समाजमा जागरण ल्याउन गैससको भूमिका महत्वपूर्ण ः मेयर कोइराला

Logo
स्थानिय आवाज प्रकाशित बिहिबार, माघ ११, २०८०

१११९  पटक हेरिएको

विराटनगर।   विराटनगर महानगरपालिकाका मेयर नागेश कोइरालाले समाजमा जागरण ल्याउन गैरसरकारी संस्थाहरुले भूमिका महत्वपूर्ण रहेको बताउनुभएको छ ।गैरसरकारी संस्था (गैसस) महासंघ मोरङको १९ औं साधारणसभा तथा नागरिक सम्मेलनलाई प्रमुख अतिथिका रुपमा सम्बोधन गर्दै मेयर कोइरालाले समाजमा रहेका छुवाछुत, महिला हिंसा, लैंगिक विभेदलगायत समस्या न्यूनीकरणका लागि गैससहरुले उल्लेखनी कार्य गरिरहेको चर्चा गर्नुभयो ।

सीमा क्षेत्रमा हुने मानव बेचविखन विरुद्धको अभियानमा गैससले राम्रो काम गरेको उहाँको भनाइ थियो । “अझै पनि विभिन्न प्रलोभनमा पारेर मानव बेचबिखन भइरहेको पाइन्छ । अझ सीमा क्षेत्रमा अहिले सबैभन्दा ठूलो समस्या लागूऔषधको ओसारपसार र सेवन रहेको छ,” उहाँले भन्नुभयो, “यसका विरुद्ध सबै मिलेर अभियान चलाउनु जरुरी छ ।” महानगरपालिकाले गर्नुपर्ने थुप्रै कामहरु गैससहरुले गरिरहेको मेयर कोइरालाले बताउनुभयो । उहाँले भन्नुभयो, “महानगरपालिकाभित्र थुप्रै समस्याहरु छन् । ती समस्याको नजिक पुगेर समाधान गर्न महानगरपालिका एक्लैले सक्दैन । यस्तो अवस्थामा गैससहरुको भूमिका महत्वपूर्ण हुन्छ ।”

उहाँले विराटनगरलाई महिला हिंसामुक्त बनाउन, बालश्रममुक्त बनाउन, लैंगिक विभेदको अन्त्य गर्न, छुवाछुत, कुसंस्कार र कुरीतिविरुद्ध लड्न महानगर र गैससहरुबीच सहकार्य जरुरी उल्लेख गर्नुभयो । कार्यक्रममा पूर्वाञ्चल बालसेवा आश्रम, अम्बे–मुरारी सेवा केन्द्र, मानवअधिकारका लागि एकल महिला समूह मोरङ, नारी विकास संघ इटहरा र युवा विकास संस्थालाई सम्मान गरिएको थियो । उनीहरुलाई मेयर कोइरालासहित आयोजक गैसस मोरङकी अध्यक्ष विष्णु शर्मालगायतले सम्मान गर्नुभएको थियो ।

कार्यक्रममा मोरङका प्रमुख जिल्ला अधिकारी प्रेमप्रसाद भट्टराई, गैससका केन्द्रीय अध्यक्ष राम सुवेदी, जिल्ला समन्वय समिति मोरङकी उपप्रमुख उषा झा, गैसस महासंघका उपमहासचिव उमेश विश्वकर्मा, प्रदेश अध्यक्ष लखनलाल साह, राष्ट्रिय मानवअधिकार आयोग कोशी प्रदेश प्रमुख पवन भट्टलगायतले शुभकामना मन्तव्य व्यक्त गर्नुभएको थियो ।

कमेन्ट गर्नुहोस्
error: Content is protected !!