
१५०२ पटक हेरिएको

साउन महिनामा युवतीहरुले हरियो चुरा, पोते र हरियो पहिरन लगाउने प्रचलन बढेको छ । रंगेली, सुनवर्सी, धनपालथान, रतुवामाई लगायतका हाटबजारमा युवतीहरुको बाक्लो उपस्थितिले चुरा र लत्ता कपडा पसलहरुमा हरियो रंगको सामग्रीको बिक्री बढेको छ ।
चुरा लगाउने प्रचलन इजिप्टबाट सुरु भएपनि नेपालमा भने भारतीय संस्कृति र बजारबाट प्रवेश गरेको पाइन्छ । साउन महिनामा भगवान शिवको व्रत प्रारम्भ गरेमा पारिवारिक सुख, समृद्धि, शान्ति, धन, विद्या आर्जन हुने विश्वास वैदिक शास्त्रमा वर्णन गरिएको छ ।
शिवजीको आरधना गर्दा साउनको सोमबार जल, दूध, भाङ्ग, धतुरो चढाउने वैदिक परम्परा रहेकामा हाल हरियो चुरा र हरियो वस्त्र लगाएर शिवजीको ध्यान गरे विवाहित महिलाहरुले आफ्नो पतिको आयु बढ्ने र अविवाहित महिला आफुले खोजेजस्तो पति पाइने भन्ने जनविश्वास रहेको छ ।
हिन्दु संस्कृतिमा हरियो चुराको वास्तविक महत्व नबुझी टोल, छिमेकीको वातावरणको प्रभावले गर्दा देखासिकीलाई अंगालेको धर्मसंस्कृतिका जानकारहरुको भनाई छ । युवा पुस्ताले भने हरियो रंगलाई प्रेम र वातावरणको प्रतीक मानेका छन् । त्यसैकारण हरियो लुगा लगाएसँगै प्रकृतिको सम्मान गरेको भन्ने भनाई पनि रहेको छ । हरियो रंग भित्र प्रकृतिको सम्मानका साथै प्रेम झल्कन्छ भन्ने बुझाई छ ।